Við sögðum frá því í sumar að HTC væri að kynna til sögunnar Hero símann en nú er svo komið að við hjá Tölvudoktor erum með einn slíkan og viljum við segja ykkur frá hvernig síminn er að standa sig.

Það fyrsta sem við finnum þegar haldið er á símanum er hversu þéttur hann virkar í hendi, en hvíta útgáfa símans er með Teflon húð og hún gerir síman þægilegan í hendi. En einnig gerir það að verkum að síminn er betur varinn fitu sem smitast frá fingrum. En skjárinn er einnig með filmu sem varnar því að fita haldist á skjánum eins og er á iPhone en rétt þarf að strjúka yfir til að losna við óhreinindi sem myndast við daglega notkun.

Skjárinn er með upplausnina 320 x 480  HVGA en einnig er Hero með innbyggðan  ljósnema sem stillir birtu skjásins. En aldrei hefur verið þörf á að minnka eða bæta við birtu skjásins þar sem síminn stendur sig afbragðsvel í að sjá um það sjálfur.

HTC Hero keyrir Android stýrikerfið frá Google en munurinn á Hero frá öðrum Android símum er að HTC tók sér góðan tíma og breytti nánast öllu í notendaviðmótinu. Þeir sem hafa notað síma frá HTC með Windows Mobile sem dæmi kannast við að viðmótið er að miklu hluta gert af HTC og er alveg sér á báti fyrir þá síma. En Sense UI er nafnið sem HTC gefur viðmótinu í Hero. Þegar síminn kom út þá var kvartað undan hægagangi í símanum þegar flett var á milli forrita og vinnsluglugga. En HTC gaf fljótlega út uppfærslu sem lagaði þetta mál og síminn sem við fengum í hendurnar kom með þessari uppfærslu og ekki urðum við varir við nein svoleiðis vandamál. Viðmótið er með því flottasta sem við höfum séð á síma hingað til og HTC með er að gera rosalega flotta hluti með Android.

Margar nýjungar er að finna í símanum sem er farið að verða staðlað í álíka símum, en eitt þeirra er símaskráin. En nú er möguleiki að tengja einstaklinga þar við facebook síðu viðkomandi. Við það bætist við afmælisdagur viðkomandi, forsíðumynd og stöðu uppfærslur inni í símaskrá símans. Einnig uppfærist forsíðumyndin af facebook þegar mynd er breytt þar. En þetta er mjög flott útfært inni í símanum sjálfum og auðvelt er að tengja þessar upplýsingar saman. Einnig er hægt að tengja Flickr síður fólks við símaskrána en þetta er viðbót sem HTC hefur gert við stöðluðu símaskrána.

Ofan á símanum er staðlað 3.5mm heyrnatóla tengi þannig að hægt er að nota uppáhalds heyrnatólin og ekki ertu fastur að nota eingöngu heyrnatól sérgerð fyrir þennan síma. Einnig er síminn með EXTUSB tengi að neðan en við það er einnig hægt að nota staðlaðar Mini USB snúrur sem fást í næstu tölvubúð. Hægt er að hlaða símann bæði með að tengja beint við rafmagn en einnig er hægt að hlaða símann frá USB tengi tölvunnar.

Síminn er furðu nettur miðað við stærð en hann er þó 135g að þyngd. Síminn er með MiniSD tengi og því er hægt að setja allt að 16 GB kort þar í til að geyma tónlist og annað. Örgjörvinn er 528MHz Qualcomm , síðan er innbyggt 512MB ROM minni og 288MB RAM inn í símanum og síminn kemur með 2GB SD korti.

Síminn styður HSPA/WCDMA sem er allt að 7.2Mbps í niðurhali og allt að 2Mbps upp. Svo styður síminn GPRS/EDGE, innbyggt þráðlaust B/G netkort og Bluetooth 2.0+EDR. Einnig er innbyggður A-GPS kubbur, stafrænn áttaviti og hreyfinemar sem finna stöðu og hreyfingar símans.

Eftir að hafa notað símann í nokkra daga þá er ekki hægt að segja annað en að þessi sími er með allt sem hægt er að hugsa sér fyrir græjufíkilinn. En ekki má gleyma að aðgangurinn að öllu er mjög auðveldur og notaður á skynsaman hátt. Google Maps virkar einstaklega vel sem dæmi og þegar kveikt er á GPS staðsetningu þá er ekki hægt að villast. Þó verður auðvitað að varast að Google Maps notast við netengingu og ekki sniðugt að nota það á meðan netnotkun gegnum símtæki er tífalt dýrara en í gegnum 3G lykil sem dæmi. En framundan er 2.0 uppfærsla á Android stýrikerfinu sem mun koma út á næstunni og þá mun Google Maps taka miklum breytingum. Fyrstu myndir og upplýsingar sýna að þá fer Google Maps að líkjast Garmin og TomTom í virkni en við munum fjalla um það þegar að því kemur.

Að okkar mati er HTC Hero einn af símum ársins og sýna styrk Android kerfisins vel, en þar spilar inn að allir valmöguleikar símans eru nýttir eins á sjálfsagðan hátt og væntingar til síma sem þessa eru uppfylltir.

Kannski er stóra spurningin hvernig er þessi sími samanborið við iPhone. Að okkar mati stendur þessi sími vel í hárinu á iPhone og á mörgum sviðum er hann fremri. Sérstaklega eftir að 2.0 uppfærslan kemur út með loforð um endurbætt Google Maps. Þegar símarnir eru skoðaðir hlið við hlið þá eru Hero sem stendur ódýrari þó svo að svona gripur kostar sitt í dag. En einnig er Hero að verða sterkari hvað varðar þann aragrúa af forritum sem eru í boði fyrir símann í dag.

Það er þó eitt sem dregur símann niður og það er að stuðningur við Íslenska stafi vantar í skjályklaborð símans. En vonandi verður bætt úr því við 2.0 uppfærsluna.

Að öðru leyti mælum við sterklega með HTC Hero fyrir þá sem vilja alvöru snjallsíma.